Rodado na Coruña e inspirado nas veciñas de Terroso, o videoclip acompaña unha muiñeira reinterpretada desde a electrónica e a estética contemporánea. A peza conta coa colaboración do colectivo PAN.SEN.FRON.
Alana, o proxecto musical que fusiona a música tradicional galega con ritmos electrónicos e pop, presenta o seu videoclip Vilardevós.
A peza, parte dunha recollida realizada ás veciñas de Terroso, en Vilardevós, que transmitía un ambiente de festa, balbordo e alegría compartida. Inspirado nesta memoria oral, o videoclip constrúe unha celebración colectiva onde a música funciona como motor de encontro e comunidade. A peza, dirixida por Einibó e producida por Undodez, combina tradición e electrónica e conta coa participación do colectivo PAN.SEN.FRON, así como dos membros de Alana: Antía Vázquez, Eloy Vidal e Pablo Castro. A rodaxe tivo lugar na Coruña, reunindo un equipo artístico e técnico que deu forma a unha posta en escena dinámica, colorida e vitalista, reforzando a sensación de festa compartida que inspira o tema.