Logo da presentación que tivo lugar no Museo do Mar de Galicia, todos os contidos de Xeosónica están dispoñibles en aberto na plataforma xeosonica.gal
A terraza do Museo do Mar de Galicia acolleu a estrea de Xeosónica, un proxecto transmedia que fai unha exploración do son desde un punto de vista artístico. A comunicadora ambiental Xiana Albor foi a anfitrioa desta xornada festiva na que fixemos públicos todos os contidos que conforman este proxecto. Durante o acto, que contou cun cóctel coa colaboración de Nordesía, os asistentes coñeceron de primeira man o proceso de creación do proxecto.
A estrea da curtametraxe MMRRSMM… (As Músicas dos Ruídos dos Sons do Mar) tivo lugar nunha proxección ao aire libre na que o son do mar de fondo mesturouse co do público asistente ao que o seu director Andrés Mahía pediu que non mantivera o silencio; xa que o protagonista absoluto do día tiña que ser o ruído. Tamén salientou o traballo de Santi Jul, responsable do son en directo e tamén, xunto con Iván Laxe das músicas mínimas e de Jairo Iglesias, director de fotografía e editor da peza.
Finalizada a proxección, foi o turno de dar a coñecer as creacións sonoras de Acacia Ojea, Carlos Suárez, Juanma LoDo e Marco Maril. Os catro artistas traballaron a partir de sons recollidos durante as gravacións do proxecto e elaboraron as súas músicas centradas nos sons da auga, dos humanos, das máquinas e do vento.
Paralelamente, a instalación Deslocalizando Xeosónica estivo instalada ata o domingo 26 de xuño na Illa de Arousa. Esta proposta itinerante traslada os sons do Atlántico no interior dun contedor marítimo, levando a creación sonora e a reflexión sobre o ruído que nos rodea fóra dos museos, a lugares que adoitan ser alleos a estas experiencias artísticas. Pretende así motivar unha reflexión na cidadanía sobre a presenza constante de ruído nas nosas vidas, presentada en forma de creación dixital de vangarda.
Xeosónica está configurado como un puzzle multimedia con múltiples pezas: paisaxes sonoras, pílulas informativas, intervencións artísticas, creacións sonoras e unha curtametraxe na que o son é o protagonista absoluto. Un enfoque experimental e lúdico que nos leva a unha viaxe dende a natureza á humanidade. Todos os contidos están dispoñibles na plataforma xeosonica.gal para o seu acceso libre. Xeosónica é un proxecto de Undodez que contou coa subvención do Ministerio de Cultura e Deporte dentro do seu programa de axuda ao Sector do Videoxogo e a Creación Dixital.