As novas aventuras de Robin, Merli, Carpin e Pegui xa están dispoñibles na plataforma Xabarin.gal. A Banda do Bosque chega con 20 novas cancións que tamén están dispoñibles nas principais plataformas de streaming.
Nestes novos episodios, a Banda do Bosque coñecerá novos amigos, descubrirá fenómenos naturais impresionantes, o poder da risa, o difícil que é despedirse dos amigos e, sobre todo, dará moitos concertos nos que cantará sobre as cousas máis fascinantes da natureza e sobre a alegría de desfrutar da amizade e vivir aventuras.
Despois do éxito dos episodios iniciais, que levaron a Bibopalula a ser a serie máis vista da plataforma infantil da Televisión de Galicia, estes novos capítulos achegan novas situacións e cancións coas que os e as máis pequenas poderán desfrutar este Nadal, con debuxos no seu idioma que buscan a mirada curiosa cara a natureza máis próxima e os seus habitantes.
Durante estas primeiras semanas, a serie conseguiu conectar coa audiencia máis esixente, as e os pequenos. As cancións de Bibopalula, que poden escoitarse nas principais plataformas de streaming, teñen xa unha lexión de pequenos e pequenas fans que, en moitos casos, achéganse por vez primeira á musica na nosa lingua dentro dun formato audiovisual.