A memoria, a identidade e as transformacións sociais serán algúns dos eixos da segunda edición de Falares. Muestra de Cine de Llanes, que reunirá entre o 6 e o 8 de novembro diferentes obras arredor destas cuestións. Entre a programación deste ano estarán tamén dúas producións documentais de Undodez: Ao son da nova regueifa e Mulleres de Castelo.
A presenza de ambas no certame permite poñer en común dúas historias diferentes, pero cun punto de partida que ten o mesmo obxectivo: a vontade de achegarse a realidades concretas e ás persoas que as protagonizan para falar, desde aí, de cuestións que transcenden o propio territorio. Nun caso, a través dunha tradición oral que continúa transformándose; no outro, a través da memoria construída polas mulleres dunha comunidade.
Dirixido por Manolo Maseda e Saúl Rivas, Ao son da nova regueifa percorre Galicia para coñecer as voces que practican, transmiten e renovan a regueifa no presente. A película sitúa esta tradición de improvisación oral nun contexto contemporáneo, mostrando a convivencia entre a herdanza recibida e as novas formas de creación que están a xurdir arredor dela. O filme continúa así un percorrido por festivais, ciclos e mostras que nos últimos meses o levou tamén fóra de Galicia.
Mulleres de Castelo, pola súa banda, naceu dun proceso comunitario desenvolvido na parroquia de Castelo, en Culleredo, arredor da memoria e das experiencias das súas veciñas. O documental, dirixido por Hadriana Casla, pon no centro as voces das mulleres maiores da parroquia e as relacións, lembranzas e redes de apoio que se foron construíndo ao longo das súas vidas. Desde a súa estrea no Castelo Conta 2024, a película iniciou un percorrido internacional con presenza en festivais e mostras de Europa, Asia e América Latina.
A selección de ambas as producións en Falares suma así unha nova cita ao percorrido de Undodez por diferentes espazos de exhibición. A segunda edición da mostra celebrarase en Llanes do 6 ao 8 de novembro, cunha programación que reúne obras arredor da memoria, a arte, a identidade e o cambio social e que busca abrir un espazo de encontro entre diferentes miradas a través do cinema.