Moitas cousas aconteceron desde que Pati (Cristina Castaño) chegou á Gloria coa intención de abrir un hotel de turismo rural. O seu cambio de estilo de vida —do taballo de executiva dunha gran empresa en Madrid a rexentar un hotel nunha pequena aldea galega— prometía calma, conexión coa natureza e riqueza espiritual. Nada —ou case nada— diso pasou.
Pati revolucionou a aldea coas súas maneiras, a súa desconexión co xeito de ser da veciñanza e, tamén hai que dicilo, pola suspicacia dos propios veciños que ven nela moito máis do que hai. E case todo malo.
A súa chegada, tamén revolucionou a Lolo (Xosé A. Touriñán), quen pouco máis tiña en que pensar que nos traballiños no seu obradoiro ata que a “madrileña” chegou á Gloria. A súa non é unha relación doada, pero é que a química é así, ás veces as cousas mesturan ben e outras… incluso poden estourar.
Logo de moitas idas e vidas, de achegamentos, despidos, ciúmes, reconciliacións… chega o momento da verdade.
Un maratón para rematar
A Televisión de Galicia proponnos para este sábado, 1 de xuño, os cinco últimos capítulos desta serie creada por Xosé A. Touriñán, Andrés Mahía e Xosé Castro e producida por Tex45 e Undodez. A partir das 22.00 horas poderemos desfrutar coa primeira comedia desenvolta para AGalega que deu o salto á televisión.
Os capítulos, de 15 minutos de duración, contan cun reparto de luxo con Cristina Castaño, Lucía Veiga, David Perdomo, Dani Rovira, Víctor Mosqueira, María Costas, Ana Santos e Xosé A. Touriñán. Neste desenlace da serie, Javier Veiga aparece como convidado especial cun papel determinante no destino de Pati e Lolo.
A serie tamén está dispoñible en AGalega.gal e nas aplicacións para dispositivos da plataforma da Televisión de Galicia.