A campaña de promoción de Bibopalula, a primeira serie musical de debuxos en galego, chegou na víspera de Reis á Coruña. Robin, acompañado de doce nenas e nenos, percorreron as rúas da cidade a bordo do Titanic, o barco que tan ben coñecen as pequenas e pequenos seguidores da Banda do Bosque.
A carroza uniuse á comitiva que abriu o camiño das súas maxestades os Reis Magos cara á praza de María Pita, onde foron recibidos pola alcaldesa da cidade. Durante a ruta, Robin tivo ocasión de saudar a todas as familias presentes, e de repartir milleiros de caramelos, mentres soaban algunhas das cancións máis coñecidas de Bibopalula.
O mellor peche para as accións promocionais durante o Nadal
Coa carroza na cabalgata de Reis da Coruña Bibopalula pecha todo un mes de promoción da serie en decenas de canles e soportes dixitais e nas estradas e rúas de toda Galicia. Durante todo decembro a serie estivo presente en grandes soportes publicitarios das principais cidades, nos estadios de Riazor e Balaídos, ou nas redes sociais grazas á colaboración de decenas de caras coñecidas da música ou o xornalismo que se prestaron a anunciar o nacemento do proxecto.