Bibopalula súmase ao ambiente festivo deste mes de decembro cun novo lanzamento musical. A serie preescolar creada por Laura Mahía e Andrés Mahía estrea Ninguén canta mal polo Nadal, unha panxoliña xa dispoñible en todas as plataformas de audio baixo o título internacional When Christmas is here.
A composición, asinada por Andrés Mahía, Santi Jul e Iván Laxe, mantén o espírito da Banda do Bosque: música accesible, ritmo luminoso e unha mensaxe que celebra o valor de cantar xuntos. Como acontece co catálogo musical da serie, a canción combina diversión, aprendizaxe emocional e un enfoque inclusivo, reforzando o papel de Bibopalula como referente da creación infantil en galego.
O lanzamento complétase cun videoclip dirixido por Laura Mahía e Lucía Rodríguez Vaquero, que traslada o universo da serie á estética invernal desta época do ano. A peza audiovisual conta coa colaboración de Deleite, reforzando o vínculo con proxectos que apostan pola nosa lingua.
A panxoliña forma parte do crecemento musical dun proxecto que, ao longo do último ano, ampliou a súa presenza global coa distribución internacional da súa banda sonora e a chegada da serie a novos mercados. Cun catálogo cada vez máis amplo en plataformas dixitais, Bibopalula continúa construíndo un universo no que música, natureza e creatividade van da man.
O tema Ninguén canta mal polo Nadal (When Christmas is here para a súa versión en inglés) pode escoitarse xa en todas as plataformas dixitais de audio.