O XXVI Salón Internacional do Libro Infantil e Xuvenil de Pontevedra abriu este venres as súas portas. Por diante, tres intensas semanas de programación centradas na literatura, pero na que tamén haberá tempo para o cine e distintas actividades lúdicas dirixidas ás máis pequenas e pequenos.
Bibopalula, a primeira serie musical de debuxos en galego, producida por Undodez e a Televisión de Galicia, estará presente durante toda a duración do Salón cun stand na zona de exposicións, pola que este sábado pasaron centos de nenos e nenas que tiveron ocasión de saudar a Robin, o paporrubio da Banda do Bosque, e tamén a Laura Mahía, creadora da serie.
As familias abarrotaron o espazo no que nunha gran pantalla non deixaron de poder verse os capítulos de Bibopalula, ao tempo que a cativada coloreaba láminas dos distintos escenarios do bosque. Moitas das pequenas e pequenos que se achegaron recibiron ademais a frauta de Robin, que puxo a banda sonora a todo o espazo do Pazo da Cultura.
O conto de Bibopalula, na tenda do Salón
A presenza da serie en Pontevedra durante estas tres semanas permitirá tamén ás familias mercar o primeiro conto da Banda do Bosque, ilustrado por Laura Mahía e escrito por Andrés Mahía. Case corenta páxinas que contan o nacemento da banda que deu lugar a todas as historias que forman parte dos cincuenta e cinco episodios da serie.