Pati descubre por casualidade que Lolo é bo fotógrafo. A pesar da sorpresa inicial, logo decátase de que é unha gran sorte, xa que precisa fotografías do hotel para atraer novos clientes desde a páxina web. Algo que pode semellar sinxelo, terá mil atrancos debido ás diferencias de caracteres de Lolo e Pati, e tamén un pouco por culpa de Bertín.
Polo camiño, aprenderemos márketing aplicado para negocios no rural grazas a Waldo e tamén sairá á luz un novo segredo de Manuel.
Este novo capítulo de ‘Na Gloria’ chega este domingo, ás 22.00 horas, á Televisión de Galicia. A serie, creada por Xosé A. Touriñán, Andrés Mahía e Xosé Castro, está protagonizada por Cristina Castaño, Lucía Veiga, David Perdomo, Víctor Mosqueira e o propio Touriñán.
‘Na Gloria’ tamén pode verse na nova plataforma de contidos AGalega, que xa conta con aplicacións para iOS e Android, e que ofrece máis capítulos da serie, así como outros programas ou filmes para desfrutar en calquera momento.