Undodez comeza o 2024 con nova páxina web. Logo de varios meses axeitando o traballo de comunicación e promoción da produtora a diferentes estratexias de dixitalización, estreamos a canle principal de difusión dos nosos proxectos, que seguirá complementándose con publicacións periódicas en redes sociais, ou o envío dun caderno mensual de actualidade por correo electrónico en moi pouco tempo.
O novo espazo de Undodez na rede recolle seccións de contido corporativo, sobre a empresa, o traballo de produción ou os servizos que ofrecemos, pero sobre todo, é o lugar no que atopar toda a información sobre cada un dos proxectos dos que participamos.
A sección de traballos permite acceder ao detalle de cada produción, coa información dos seus equipos, e noticias relacionadas, tanto publicadas na web de Undodez, como en medios externos.
A web complétase coa sección de caderno, que recolle as novidades sobre a actividade da produtora.
Espallar: a gran aposta pola consolidación da nosa estrutura
Nas próximas semanas a web de Undodez completarase cun espazo dedicado ao proxecto Espallar. Trátase dun plan en colaboración co Ministerio de Cultura, a través da súa liña de modernización e innovación das industrias culturais e creativas, que busca tecer as redes necesarias para a produción de contidos complementarios relacionados cos nosos proxectos, de xeito que sexa posible manter durante máis tempo aos equipos técnicos, artísticos e de produción, e así facer máis sólida a estrutura da produtora.
Estreamos a nova web de Undodez
Recompila todos os nosos traballos, así como unha sección de actualidade, e o detalle dos servizos técnicos e de produción cos que participamos da industria do audiovisual en Galicia.
