A estrea de ‘Na Gloria’ tivo unha gran acollida, situándose como o contido máis visto de AGalega neste primeiro mes de vida. A nova plataforma de contidos dixitais da Televisión de Galicia apostou pola comedia de Xosé A. Touriñán, Andrés Mahía e Xosé Castro para o seu lanzamento e o público respondeu.
O primeiro capítulo, cunha duración especial de media hora, foi o máis visto do mes. Cun elenco formado por Cristina Castaño, David Perdomo, Lucía Veiga, Dani Rovira e o propio Touriñán, a comedia levantara unha grande expectación e os datos de audiencia refrendaron esa aposta da canle pública.
‘Na Gloria’ está deseñada para o seu consumo na app, con capítulos de 15 minutos que irán estreándose semanalmente. No primeiro episodio coñecimos a Pati, Lolo, Waldo, Paca e Bertín, e vimos que a vida na Gloria non era tan idílica como Pati lembraba.
A plataforma da Televisión de Galicia alcanzou máis de medio millón de sesións, chegando a 125 países, entre os que sobresaen os Estados Unidos, Suíza e o Reino Unido. A serie ‘Ghuasapp’, a longametraxe de animación ‘Valentina’ ou o ‘Pensando en ti’ foron outros dos contidos destacados deste primeiro mes de vida de AGalega.