O pasado mes de agosto estreábase ‘Nena’ en Castelo (Culleredo), nun evento moi especial que contou coa participación da equipa da curta. A súa proxección no festival Castelo Conta fixo deste un acontecemento especialmente emotivo por ser a vila natal de Xosé A. Touriñán, director do filme xunto a Jairo Iglesias.
Dende a súa presentación, ‘Nena’ non deixou de xirar polas seleccións de mostras e festivais internacionais e nacionais. A última destas citas, o pasado 1 de novembro moi preto daquí, na XXIV Mostra de Curtas Vila de Noia. Ata o momento, son xa 6 os galardóns obtidos e máis de 20 seleccións en certames especializados.
A súa grande aceptación por parte de xurado e audiencia fixo que a curtametraxe protagonizada por Antía e Xosé A. Touriñán, Carlos Blanco e David Perdomo acadara numerosos galardóns. O máis recente, o premio na categoría a mellor curta na XI edición de Cencor Orcasitas. Xa en territorio galego, a curta foi recoñecida no Festival de Cine Curto de Ribadeo e na Semana de Cine de Lugo, na categoría a mellor curtametraxe e mellor película galega respectivamente.