A curtametraxe Nena, producida por Undodez, recibiu en Barcelona o premio á mellor curtametraxe no festival Curt-Movies. Nun acto celebrado na tarde de onte no Cinema Maldà, en Barcelona, Fernando Balseiro recolleu en nome do equipo do filme o galardón.
Nena foi a obra máis valorada polo xurado entre as máis de sesenta curtametraxes candidatas ao premio, e suma un novo recoñecemento co que xa supera os vinte, ademais de cincuenta seleccións en certames nacionais e internacionais.
Escrita por Xosé A. Touriñán, Nena conta historia dunha rapaza de doce anos (Antía Touriñán) que debe asumir toda a responsabilidade nos coidados da súa familia (Xosé A. Touriñán, Carlos Blanco e David Perdomo) logo da morte inesperada da súa nai.
Rodada en Mondoñedo e estreada en Castelo (Culleredo) en agosto do 2023, está tamén dirixida por Xosé A. Touriñán, xunto con Jairo Iglesias, e é unha coprodución de Undodez e Mordisco Films.