A curtametraxe dirixida por Xosé A. Touriñán e Jairo Iglesias resultou vencedora nesta segunda edición do festival castellonenco
O Festival Internacional de Cine de Vilafamés celebrou a súa segunda edición cun gran éxito de participación e público. ‘Nena’ acadou o primeiro premio do xurado, quen tamén premiou a Luisa Gavasa e Alain Hernández polo seu traballo actoral en París 70 e a Elena Escura pola súa curta ‘Hábitat’ na categoría provincial.
Xosé A. Touriñán e Alberto Díaz, produtores da fita, recolleron o premio na gala celebrada este sábado, 1 de xullo, en Vilafamés, Castellón. É o primeiro premio que recibe a curtametraxe, que acaba de comezar o seu percorrido por festivais de todo o mundo.
‘Nena’ conta a historia dunha familia cambaleada pola morte da nai. A situación desestrutura o núcleo familiar e deixa a responsabilidade do mesmo a Nena, unha cativa de doce anos de idade que, ante a falta de capacidades ao seu redor, asume un rol imposto e leva as súas costas a supervivencia de tres homes.
A curta, filmada en Mondoñedo no verán de 2022, é unha produción de Undodez e Mordisco Films. Para a súa realización, contou co apoio da Agadic e do Concello de Mondoñedo.