Nena continúa colleitando éxitos no seu percorrido polos festivais. Na XXVI Edición do Certame Internacional de Curtametraxes “Ciudad de Soria”, celebrada do 8 ao 17 de novembro de 2024, a obra foi recoñecida con dous premios. Un deles foi o Premio RC Service á Mellor Dirección de Fotografía, outorgado a Pedro Tizón, pero tamén o Premio PNR Ópera Prima á Mellor Curtametraxe Español, concedido pola Plataforma Nuevos Realizadores.
Este último galardón, que se entregou por primeira vez nesta edición, destaca a mellor obra inicial dun director ou directora no ámbito estatal, premiando o traballo de Xosé A. Touriñán e de Jairo Iglesias.
A curta, seleccionada entre 54 traballos procedentes de 14 países, destacou pola súa calidade visual nun evento que promove a curtametraxe como medio esencial de expresión audiovisual e a recoñece como unha parte imprescindible do cine.
Nena conta a historia dunha familia cambaleada pola morte da nai. A situación desestrutura o núcleo familiar e deixa a responsabilidade do mesmo a Nena, unha cativa de doce anos que, ante a falta de capacidades ao seu redor, asume un rol imposto e leva ás súas costas a supervivencia de tres homes.
Estes últimos recoñecementos súmanse a unha lista que xa supera as dúas cifras e que levou esta historia orixinal de Touriñán por festivais de todo o mundo.