A curtametraxe Nena, foi unha das grandes protagonistas da recente edición do Festival Internacional de Cinema Villa de Ledesma, celebrado a pasada fin de semana neste municipio salmantino. A historia, que explora a perda e o cariño, destacou no festival conseguindo tres premios.
A curta alzouse co galardón a Mellor Curtametraxe de Ficción, recoñecendo a súa sobresaínte narrativa e a forma na que achega ao público esta historia familiar. Ademais, o traballo dos seus directores, Xosé A. Touriñán e Jairo Iglesias, foi premiado co galardón a Mellor Dirección, destacando a súa posta de escena e capacidade para retratar aos personaxes. Finalmente, Antía Touriñán foi recoñecida co premio a Mellor Actriz, grazas a súa fantástica interpretación.
O éxito de Nena resalta o crecente interés polas narrativas propias e singulares. Ademais, este festival pretende levar a escena rural á gran pantalla e dar protagonismo a aquelas vilas que gozaron de esplendor en épocas pasadas.