Desde a súa estrea na Televisión de Galicia, Bibopalula convertiuse nun dos proxectos infantís máis recoñecibles dos últimos anos na produción audiovisual galega. A combinación de música, humor e aprendizaxe provocou que milleiros de crianzas se achegaran á Banda do Bosque, impulsando a finais de 2024 un novo paso adiante: levar o universo da serie ao teatro a través de Bibopalula · O Espectáculo.
Hai menos dun ano que Ava, Robin, Carpin, Merli e Pegui deixaron a pantalla para subirse aos escenarios, nunha proposta que transformou o imaxinario televisivo nunha experiencia en vivo. A resposta do público marcou un punto de inflexión: máis de dez mil espectadores participaron naquela primeira viaxe escénica, consolidando un formato que ampliaba o valor educativo e lúdico da serie e reforzaba a súa presenza na cultura familiar en galego.
Agora, a experiencia continúa medrando. Bibopalula · O Espectáculo regresa este inverno cunha segunda tempada que afonda no universo creado por Andrés Mahía e Laura Mahía, levando ás familias a explorar o bosque desde novos ángulos e cun relato de Marta Lado que continúa expandindo a narrativa da serie. O espectáculo integra doce cancións orixinais xa coñecidas polo público, e converte o teatro nun espazo inmersivo no que natureza, música e aventuras comparten protagonismo.
Lidia Veiga volve interpretar a Ava, a observadora de paxaros que guía ás crianzas nesta nova misión, acompañada pola Banda do Bosque (Cristina Andrade, Graciela Carlos, Sara Ferro e Nerea Rodríguez) nunha historia na que o Señor Moucho encomenda un novo desafío que conecta co espírito da serie: descubrir, interpretar e coidar o que acontece no bosque.
A nova xira arranca este 30 de novembro no Culturgal, en Pontevedra, e continúa o 20 de decembro en Vilagarcía, o 28 de decembro na Coruña e o 2 de xaneiro en Vigo. Un percorrido invernal que mantén viva a esencia do proxecto audiovisual e achega ás familias galegas unha maneira diferente de seguir vivindo Bibopalula máis alá da pantalla.
As entradas están dispoñibles a través da web bibopalula.gal.