O filme, protagonizado por Mauricio Ochmann, Marta Hazas e o propio Javier Veiga está rodándose estes días en diferentes localizacións de Ourense, O Grove e Santiago de Compostela. Conta co apoio da Xunta de Galicia, Xacobeo 21·22 e a Deputación de Ourense
A pasada semana arrincou no Grove a rodaxe de Amigos Hasta la Muerte, primeira longametraxe como director de Javier Veiga. Producida por Undodez e Medio Limón, está protagonizada por Marta Hazas e Mauricio Ochmann ademais do propio Veiga e baseada na obra de teatro homónima escrita tamén polo grovense. Ourense, Santiago de Compostela e diferentes etapas do Camiño Xacobeo serán as localizacións desta comedia que conta co apoio da Xunta de Galicia a través do seu programa Hub Audiovisual Industria Creativa, Xacobeo 21·22 e a Deputación de Ourense. Estas axudas da Xunta de Galicia a través do Hub Audiovisual están dotadas cun orzamento de 9,6 millóns de euros para o período 2021-2023 a través do Fondo Europeo de Desenvolvemento Rexional (FEDER) dentro do Eixo REACT-UE do Programa Operativo Feder Galicia 2014-2020, como parte da resposta da Unión Europea á pandemia da Covid-19.
Luna Gallego, Nacho Nugo e Óscar Allo interpretarán os personaxes de Marta Hazas, Mauricio Ochmann e Javier Veiga de novos e o resto do elenco está formado por recoñecidos actores como Xosé A. Touriñán, David Amor, Ledicia Sola, Mela Casal ou Fele Martínez. O músico coruñés Xoel López contará tamén cun pequeno papel ademais de compoñer varios temas para a banda sonora dunha película na que a música ocupa un lugar destacado da trama.
Amigos Hasta la Muerte é unha historia sobre os límites da amizade. Unha historia con moitas cousas por pechar: plans, promesas, risas, desculpas, reconciliacións, lembranzas, bágoas, máis risas… cousas pendentes e segredos que, se cadra, chegaron ao momento de ser destapados. Está baseada na obra de teatro do mesmo nome que triunfou nos escenarios de España e América Latina con versións en español, galego, catalán e éuscaro. A súa estrea está prevista para o primeiro semestre de 2023.