O universo de Bibopalula continúa abríndose camiño máis alá das nosas fronteiras. Do 10 ao 12 de novembro, o equipo de Undodez participou no CEE Animation Forum 2026, un dos principais encontros profesionais da industria europea da animación, celebrado na cidade de Pilsen, na República Checa. A produtora acudiu ao foro para presentar Bibopalula. Aventura no Atlántico, a súa nova longametraxe de animación.
A película de Undodez formou parte da categoría de Feature Films, integrada por sete proxectos procedentes de Galicia, Francia, Polonia, Luxemburgo, República Checa e Hungría. Bibopalula. Aventura no Atlántico foi a única proposta galega desta selección, na que tamén participaron Back to Tomioka, Dancing Bears, Father’s Letters, Lyra & Armin, Paradise on Earth e The Ghost of the Riverbend.
A presentación tivo lugar o xoves 12 de novembro e foi valorada por un xurado integrado por Edmunds Jansons, Mathieu Rolin e Yutong Yu, profesionais vinculados á industria internacional da animación. A sesión permitiu dar a coñecer o proxecto diante dun público especializado e compartir espazo con outras propostas que amosan a diversidade creativa e narrativa da produción europea actual.
O CEE Animation Forum é un dos principais mercados de desenvolvemento, financiamento e coprodución da animación en Europa Central e Oriental. Na súa décimo cuarta edición, o encontro volveu reunir profesionais de distintos ámbitos da industria arredor de tres eixos fundamentais: a competición de proxectos, o mercado profesional e as reunións individuais entre participantes. Unha oportunidade para coñecer novas propostas, compartir experiencias e establecer contactos con produtoras, distribuidoras, axentes de vendas, televisións e outros axentes do sector.
Durante as tres xornadas, o equipo de Undodez puido coñecer de primeira man o funcionamento deste mercado, establecer relacións con profesionais de diferentes ámbitos da industria e explorar posibles vías de colaboración que permitan seguir impulsando o proxecto máis alá do seu ámbito de orixe. Ademais, o encontro permitiu descubrir proxectos con formatos e linguaxes moi diferentes e intercambiar impresións con profesionais que traballan en distintos contextos europeos.
A dimensión internacional do foro quedou reflectida tamén no seu programa de actividades, que incluíu presentacións e conversas sobre cuestións de actualidade para o sector. Isto permitiu achegarse, desde diferentes perspectivas, aos retos creativos, industriais e de distribución aos que se enfronta a animación europea.
Unha nova aventura para a Banda do Bosque
Bibopalula. Aventura no Atlántico é a primeira longametraxe baseada no universo da serie de animación Bibopalula, protagonizada por Robin, Pegui, Merli e Carpin. Nesta nova historia, a Banda do Bosque emprende unha viaxe polo océano coa misión de reunir músicos de diferentes lugares do planeta para organizar o maior concerto da historia. Unha aventura na que a música, o humor e a exploración se combinan cunha mensaxe arredor da protección da natureza e da importancia da cooperación entre pobos.
A película, dirixida por Laura Mahía, estende así o universo da serie cunha historia concibida para dar o salto á gran pantalla e achegar os seus personaxes a novas audiencias. A súa selección no CEE Animation Forum supón un novo paso no desenvolvemento do proxecto e unha oportunidade para compartir a proposta con profesionais da animación internacional.
