Nena, a curta de Xosé A. Touriñán e Jairo Iglesias, continúa acadando éxitos. Ao seu palmarés únense os tres recoñecementos recibidos esta fin de semana en Noia e Almassora (Castellón).
O pasado sábado 11 tiña lugar no Teatro Coliseo Noela a Gala de entrega de Premios da XXIV Mostra de Curtametraxes Vila de Noia, na que Nena foi premiada por partida dobre. Así, a produción recibiu o Premio Blog Español na categoría a mellor curta española e o Premio Ex Aequo para David Perdomo pola súa interpretación na mesma.
Do mesmo xeito, a interpretación de Perdomo na curta producida por Undodez e Mordisco Films foi galardoada no 5º Festival Internacional de Cortometrajes de Almassora. O cómico coruñés recibiu no festival valenciano o Premio EMAT a mellor actor polo seu papel no guión orixinal de Touriñán.
En Nena David Perdomo dá vida a Tío, unha persoa inxenua á par que sensible que se esforza por coidar da súa familia logo da tráxica perda que a fai cambalear. Ao longo do filme a súa sobriña Nena, interpretada por Antía Touriñán, tratará de integralo e coidar del mentres o seu pai e o seu irmán viven o seu loito sen case percatarse da súa presenza.