A regueifa vive un novo tempo. Unha etapa de renovación na que tradición e modernidade conviven para devolverlle presenza pública a unha arte oral que estivo a piques de desaparecer. Nese contexto nace Ao son da nova regueifa, o novo documental producido por Undodez, que estreará a súa versión completa o 28 de novembro ás 16.00 no Culturgal, dentro da programación oficial da Feira das Culturas Galegas.
Dirixido por Saúl Rivas e Manolo Maseda, co traballo de realización de Jairo Iglesias e Adolfo Fernández e a dirección de produción de Laura Canto, o filme percorre Galicia desde Bergantiños ata Vigo para retratar as novas xeracións que están a redefinir esta práctica de improvisación oral. O resultado é un relato coral no que voces, música e versos improvisados constrúen unha fotografía viva da regueifa no presente.
A peza propón un diálogo entre territorios, experiencias e maneiras de aprender e transmitir. A través das testemuñas de regueifeiras e regueifeiros, o documental amosa como a tradición se mantén e transforma ao mesmo tempo: desde os obradoiros e espazos educativos ata os encontros comunitarios ou os escenarios de festivais e feiras de cultura.
O proxecto é tamén unha invitación a repensar o lugar da palabra na comunidade. Ao son da nova regueifa reivindica a improvisación como ferramenta creativa, social e identitaria; como un acto de celebración colectiva no que o ritmo e a voz constrúen pontes entre pasado e futuro.
A estrea no Culturgal contará coa presenza do equipo creativo e dalgúns dos protagonistas da rodaxe, que participarán nun pequeno faladoiro despois da proxección. Será a primeira ocasión para ver o documental completo e descubrir o traballo de máis de dous anos de investigación, gravación e viaxes por todo o país.