A produtora internacional Animotion Media e Undodez Producións anuncian un acordo para levar a música de Bibopalula, a primeira serie musical de animación en galego, a plataformas dixitais de todo o mundo.
Creada por Laura Mahía e Andrés Mahía e coproducida pola Televisión de Galicia, Bibopalula continúa a súa expansión internacional coa distribución global da súa banda sonora. O acordo, asinado con Animotion Media, permitirá que os temas orixinais da serie (compostos por Santi Jul e Iván Laxe) estean dispoñibles en Spotify, Apple Music, Amazon Music e YouTube Music, ampliando o alcance dun proxecto que combina natureza, amizade e aprendizaxe a través da música.
A serie, pensada para os espectadores máis pequenos, presenta as aventuras da Banda do Bosque: a pega Pegui, o merlo Merli, o paporrubio Robin e Carpin o picapau, catro paxariños que descobren xuntos a natureza e fan música xuntos. Con capítulos de cinco minutos, Bibopalula converteuse nun referente do contido familiar en galego e mesmo inspirou un espectáculo teatral que percorreu escenarios de toda Galicia.
Segundo destacou Animotion Media, Bibopalula representa “un exemplo de creatividade e calidade no contido musical infantil”, e o seu catálogo contribuirá a reforzar a presenza de producións orixinais na oferta global de música para público familiar. O primeiro lanzamento internacional é o sinxelo “A Poza”, xa dispoñible nas principais plataformas dixitais.
Con este acordo, Bibopalula continúa a consolidar a súa presenza máis alá de Galicia, reforzando a proxección da animación e da creación musical galega no ámbito internacional.