Unha familia de cinco vese cambaleada pola morte dunha muller: nai, esposa, nora, cuñada… Unha situación que desestrutura o núcleo familiar. Unha nena de doce anos asume toda a responsabilidade.
Esa nena é Antía Touriñán, protagonista de ‘Nena’. O primeiro traballo de Xosé A. Touriñán detrás das cámaras, como director e guionista dunha curtametraxe estreada en Castelo (Culleredo) en agosto do 2023, e rodada un ano antes en Mondoñedo. AGalega, a plataforma de contidos dixitais da Televisión de Galicia vén de poñela ao dispor do público esta semana.
Carlos Blanco e David Perdomo protagonizan xunto co propio Touriñán e Antía o filme, no que tamén participan Sergio Zearreta, Andrés Mahía, Noemi Rodríguez ou Patricia Castrillón. Pedro Tizón e Tania Villaga son o director de fotografía e a directora de arte de ‘Nena’, que tamén conta cunha canción orixinal de Belem Tajes.
Codirixida por Touriñán e Jairo Iglesias, ‘Nena’ suma desde a súa estrea hai pouco máis dun ano preto de vinte premios en festivais e certames nacionais e internacionais, así como máis de cincuenta seleccións.