Será o domingo 30 de abril, ás 20:30 horas no Teatro Colón da Coruña.
Trala súa preestrea no Festival de Cine de Málaga e a presentación a medios galegos en Ourense, o filme Amigos hasta la muerte, escrito e dirixido por Javier Veiga, proxéctase por primeira vez ao público xeral no Encontro Mundial de Humorismo (EMHU) na Coruña o vindeiro domingo, 30 de abril, ás 20:30 horas no Teatro Colón.
Ademais da proxección, a presentación da película no EMHU inclúe coloquio e un espectáculo aberto ao que xurda. O evento contará coa presenza de Javier Veiga, Marta Hazas, David Amor e Xosé A. Touriñán, nunha charla onde se poderán coñecer moitas intrahistorias da gravación e gozar do humor dos catro actores e actrices (e tamén amigos).
As entradas para este primeiro pase para o público xeral están a piques de esgotarse. O filme chegará aos cines o 15 de setembro.
Sobre o filme
Protagonizado polo propio Javier Veiga, Marta Hazas e Mauricio Ochmann, o filme conta a historia de María, Nacho e Suso, tres amigos de toda a vida. Xuntos compartiron moitas cousas, quizais incluso demasiadas… E, de repente, a dous deles vailles tocar compartir o secreto de que o outro vai morrer. Pero antes quédalles moito por facer: plans, promesas, reproches, risas, reconciliacións, lembranzas, máis risas, algunha bágoa… e algo pendente que quizais chegou a hora de destapar. Os tres van descubrir o pouco que importan agora as cousas que parecían importantes.
O filme conta ademais coa participación de Luna Gallego, Nacho Nugo e Óscar Allo, que interpretan a María, Nacho e Suso cando tiñan só vinte anos, e actores galegos como Xosé A. Touriñán, David Amor, Ledicia Sola, Mela Casal ou o músico Xoel López.