O filme, protagonizado por Javier Veiga xunto a Marta Hazas e Mauricio Ochmann, fixo parada a pasada fin de semana na Mostra de Curtas Vila de Noia. A proxección da peza, á que asistiu o seu director e parte do elenco, inaugurou o programa da 24ª edición do certame.
A primeira longametraxe de Veiga como director e guionista recala na localidade coruñesa logo dun amplo percorrido por festivais de toda a xeografía española. Dende a súa preestrea no Festival de Málaga, o filme xirou polas seccións oficiais de numerosos certames cunha gran acollida. Entre eles, os festivais de cinema de Alacant, Santander ou Tudela.
Amigos hasta la muerte conta a historia de María, Nacho e Suso, tres amigos que levan toda unha vida compartindo experiencias persoais que os uniron e separaron ao longo dos seus anos de amizade. Con moitos plans todavía por diante, a súa relación troca cando de súpeto teñen que convivir co segredo da enfermidade terminal dun deles.
Coproducida por Undodez e Medio Limón, a comedia continúa co seu percorrido polas pantallas de todo o territorio. A seguinte parada será na 22ª edición do Festival Internacional de Cine de Almería, certame que se celebra na cidade andaluza do 17 ao 26 de novembro.