Nestes días comezamos o proceso de produción do noso novo proxecto: Bibopalula, unha serie de animación feita en galego e pensada para primeiros espectadores. Os capítulos xirarán arredor de catro paxaros que teñen unha banda de música e que darán conta de moitas historias relacionadas cos ciclos da natureza. As súas aventuras descubriranlle ao público máis pequeno un mundo novo que se esconde entre as ramas, as nubes e o ceo.
Desta forma continuamos un camiño iniciado con Bechos, a nosa primeira serie animada orientada á nenez e producida para a Televisión de Galicia, que vén de estrearse nos últimos meses. A aposta de Undodez por crear contidos audiovisuais pensando nos máis cativos e cativas ten así continuidade con Bibopalula, un proxecto que conta subvención da Xunta de Galicia a través das axudas da Agadic á produción e coprodución de proxectos audiovisuais galegos.
O equipo encargado da serie tamén responde a outra das liñas mestras de Undodez: ofrecer contidos en galego producidos por profesionais do país. Bibopalula está deseñada e dirixida por Laura Mahía, mentres que os guións corren a cargo de Andrés Mahía. Ademais, cada un dos episodios contará coa supervisión pedagóxica de Patricia Castrillón e cunha canción orixinal composta por Santi Jul e Iván Laxe.