A nosa serie de animación para primeiros espectadores, ‘Bechos’, xa está dispoñible na nova app do Xabarín que vén de estrear a CRTVG. A aplicación pódese descargar en Google Play e App Store, mais tamén é posible acceder aos seus contidos a través da súa páxina web.
Este espazo enmárcase no lanzamento de AGalega, unha plataforma dixital de contidos audiovisuais que viu a luz este mércores e que xa inclúe outras producións de Undodez como a serie ‘Nosoutras’. En total hai máis de 1.400 títulos de primeiro nivel entre os que se inclúen filmes, series e programas recoñecidos polo público.
Desta forma, ‘Bechos’ suma unha nova ventá de visualización que se engade ás que xa estaban na rede, como son a canle de Youtube da TVG e a páxina web da CRTVG. Alén destes sitios, o proxecto conta co espazo bechos.gal onde están dispoñibles todos os episodios e máis información da serie.