O Celtic Media Festival anunciou as candidaturas da súa próxima edición, que terá lugar en Belfast durante o mes de xuño, reunindo profesionais do audiovisual procedentes de Irlanda, Escocia, Gales, Bretaña, Cornualles, a Illa de Man e Galicia. Entre os proxectos seleccionados atópanse dúas producións galegas, as series de animación infantil Bibopalula e Pipo, finalistas na categoría Children’s Programme (Screen).
O festival, que leva máis de corenta anos celebrándose, ten como obxectivo promover as linguas e culturas das nacións celtas a través dos medios audiovisuais, así como impulsar o talento creativo e a produción en linguas minoritarias. Ao longo de tres días (do 2 ao 4 de xuño) combínanse conferencias, clases maxistrais e encontros profesionais coa entrega dos Premios Torc, que recoñecen a excelencia en televisión, radio, cinema e medios dixitais.
Dúas propostas galegas para o público infantil
Por unha banda, Bibopalula, dirixida por Laura Mahía, é unha serie musical de animación protagonizada pola Banda do Bosque, Robin, Pegui, Merli e Carpin, que combina historias sobre a natureza con cancións orixinais pensadas para as primeiras idades. Ao longo dos seus episodios, a serie propón unha aproximación lúdica ao medio natural e aos seus ciclos, utilizando a música como eixo narrativo.
Pola súa parte, Pipo, creada por Laura Mahía e Andrés Mahía, conta as aventuras de Berta e dun pequeno extraterrestre que chega inesperadamente á súa casa e transforma o día a día nun espazo cheo de descubrimentos. Pensada para nenos e nenas de entre cinco e oito anos, a serie combina humor, imaxinación e pequenas historias cotiás nas que aprender e explorar o mundo.
Un escaparate internacional para o audiovisual galego
A presenza de Bibopalula e Pipo no Celtic Media Festival supón unha nova oportunidade para dar visibilidade internacional ao audiovisual galego, nun encontro que cada ano reúne produtores, creadores e responsables de medios.
Ademais de ser un espazo de recoñecemento para os mellores contidos, o festival converteuse nun punto de encontro clave para novas alianzas e coproducións europeas, fortalecendo os vínculos culturais e creativos entre os territorios participantes.