A serie de animación creada por Andrés Mahía e Laura Mahía, e que Undodez produce xunto coa Televisión de Galicia, inicia no mes de febreiro o seu percorrido por diferentes festivais e mercados internacionais para chegar a novos territorios e linguas. O Kidscreen Summit de San Diego (California, EE.UU.) contará cunha delegación da produtora galega -a única da nosa comunidade que asistirá- como parte da misión do Icex.
Bibopalula estreouse o pasado mes de novembro en Xabarin.gal, a plataforma de entretemento da Televisión de Galicia, converténdose no contido máis visto desta canle dixital. Desde entón, a Banda do Bosque está presente en diferentes medios e soportes para promocionarse entre as familias galegas, cunha campaña de difusión en prensa dixital e en papel, publicidade exterior, ou accións en colaboración co Celta e o Deportivo, ou en redes sociais con diferentes influencers galegas e galegos.
No Kidscreen a delegación de Undodez explorará posibilidades de distribución da serie en distintos territorios e idiomas, tendo en conta os valores universais sobre os que foi creada, entre os que destacan a música e a aprendizaxe sobre o medio natural.
O Kidscreen Summit é un dos grandes mercados mundiais da industria de contidos de entremento infantil. Á pasada edición asistiron máis de 1.800 delegados de 50 países, entre produtoras, axentes de vendas, distribuidoras, canles de televisión e plataformas.