A Agadic participou no European Film Market de Berlín, o mercado audiovisual paralelo á Berlinale, onde presentou o novo catálogo Films from Galicia de 2024, integrado por 75 títulos galegos para cine e televisión.
Films from Galicia é a marca creada pola Xunta, no marco do programa de internacionalización do audiovisual galego, para contribuír á promoción exterior da produción cinematográfica e televisiva galega, así como para reforzar a súa presenza nos principais mercados do sector, tanto dentro como, especialmente, fóra de España. Dentro deste catálogo, agrupado por longametraxes de ficción, documentais, animación e televisión, atopamos ‘Bibopalula‘, a nova produción de Undodez para primeiros espectadores, que se atopa neste momentos en fase de produción avanzada.
‘Bibopalula’ é unha serie de animación musical deseñada para ver múltiples veces por espectadores primeirizos. Está composta de historias de cinco minutos protagonizadas por uns paxariños que teñen un grupo musical e nas que a natureza —e os seus ciclos— ocupa sempre un lugar principal. Protagonizada pola pega Pegui, o merlo Merli, o paporrubio Robin e o peto Carpin, a serie busca achegar a vida natural próxima ás nenas e nenos que se achegan por vez primeira ao audiovisual.
Dirixida por Laura Mahía, a serie constará de 55 episodios de 5 minutos nos que a música e os ciclos da natureza son os protagonistas. Iria Lamas, Marta Lado, Laura Mahía, Marita Martínez e Melania Cruz poñen as voces dos personaxes principais de ‘Bibopalula’. A serie, que conta co apoio da Agadic e a participación da Televisión de Galicia, verá a luz na segunda metade de 2024.