A serie de animación Bibopalula producida por Undodez e a Televisión de Galicia, foi recoñecida en Pontevedra co Premio Deleite á promoción da lingua, no marco da XXIII edición dos Premios Mestre Mateo. Estes galardóns, que promove a Academia Galega do Audiovisual nas semanas previas á gran gala de entrega dos seus premios, salientan producións comprometidas con valores como a sostibilidade ou a difusión da lingua galega.
O xurado recoñeceu á serie creada por Andrés Mahía “por ofrecer a unha nova xeración de nenos e nenas a posibilidade de desfrutar dunha serie de animación feita na nosa lingua”, ao tempo que destacou a transcendencia do contido máis alá do audiovisual “a través dunha ampla oferta de contidos complementarios que sinalan un camiño cara un escenario máis optimista para o futuro do galego”.
Laura Mahía, directora da serie, recolleu o premio nun acto celebrado na sede da Deputación de Pontevedra, onde destacou a importancia de que sigan existindo contidos para que as nenas e nenos poidan medrar na súa lingua.
O resto de candidaturas finalistas de Undodez, presentes no encontro
A xuntanza de finalistas dos Premios Mestre Mateo reuniu no Pazo Provincial de Pontevedra a máis de cento cincuenta profesionais do audiovisual galego, entre eles, os equipos das obras finalistas de Undodez: Saúl Rivas e Borja Casal, directores de Recollendo Músicas ou Amara Fontao, directora de Nosoutras (nos dous casos finalistas a mellor programa), o realizador Adolfo Fernández -finalista na categoría de mellor realización por Recollendo Músicas– ou a actriz Lucía Veiga, finalista a mellor interpretación feminina protagonista por Na Gloria. Estiveron tamén presentes os produtores de Undodez, Javi Lopa -finalista xunto con Ana Míguez á mellor dirección de produción por +Cuñados-, e Álvaro Pérez Becerra, que é tamén presidente da Academia Galega do Audiovisual.