Pontevedra acolleu na mañá deste xoves a lectura de finalistas dos XXIII Premios Mestre Mateo, que se celebrarán en Lalín o 15 de marzo. Susana Sampedro e David Machado foron encargados de desvelar as producións e profesionais que competirán nesta edición dos galardóns organizados pola Academia Galega do Audiovisual.
As tres producións de Undodez suman un total de cinco candidaturas finalistas: ‘Bibopalula’, a primeira serie musical de animación en galego, opta ao premio a mellor serie de televisión. Había dezaoito anos que unha serie de animación non era finalista na categoría de mellor serie de televisión, o que supón un novo fito na curta pero exitosa traxectoria da serie dirixida por Laura Mahía, que competirá con ‘Rapa’, ‘Clanes’ e ‘El circo de los muchachos’.
A proposta de exploración musical ‘Recollendo músicas’, dirixida por Saúl Rivas e Borja Casal, é finalista como mellor programa e mellor realización –Adolfo Fernández-. Competirá co programa divulgativo ‘Nosoutras’, tamén nas categorías programa e realización -Jairo Iglesias-.
Ademais, Lucía Veiga aspira ao premio á mellor interpretación feminina protagonista polo seu papel en ‘Na Gloria’, un proxecto compartido de Undodez e Tex45.
O director de produción e produtor de Undodez, Javi Lopa, é tamén finalista na categoría de mellor dirección de produción polo seu traballo en ‘+ Cuñados’, xunto con Ana Míguez.