O público máis pequeno de Galicia terá en menos dunha semana un contido inédito para a súa aproximación ás pantallas. Bibopalula é a primeira serie musical de debuxos animados en lingua galega, que producimos coa Televisión de Galicia e que se estreará a través de xabarin.gal e a aplicación móbil do Xabarín.
A serie, creada por Laura Mahía e Andrés Mahía, consta de 55 capítulos de 5 minutos nesta primeira temporada. Os protagonistas de Bibopalula son o paporrubio Robin, o merlo Merli, a pega Pegui e o peto Carpin; a Banda do Bosque. Xunto a eles, o resto de paxaros que viven no bosque achegan pequenas historias e aprendizaxes en cada capítulo. Melania Cruz, Marta Lado, Iria Lamas, Marita Martínez ou Xosé A. Touriñán son algunhas das actrices e actores galegos que poñen voz aos protagonistas e ao resto de habitantes do bosque.
Os ciclos da natureza, desde a chegada do inverno ata a das andoriñas, son a guía e o marco das aventuras desta serie que ten na música un dos seus grandes valores: cada episodio remata coa interpretación pola Banda do Bosque dunha canción baseada nas aventuras dos protagonistas. Todos os temas orixinais da serie foron compostos por por Santi Jul e Iván Laxe.
Unha produción inédita
Por primeira vez, o público infantil no tramo de idades de 3 a 6 anos terá á súa disposición un contido audiovisual de temática musical na nosa lingua, feito integramente por profesionais e empresas galegas. Esta aposta de Undodez responde ao compromiso da produtora coa produción en galego e desde Galicia. A aplicación do Xabarín —dispoñible en iOS, Android e para diferentes Smart TVs— e xabarin.gal estrearán a serie o próximo venres, 29 de novembro, co lanzamento dos primeiros vinte episodios.
Bibopalula conta coa participación da Televisión de Galicia e co apoio da Xunta de Galicia a través da Axencia Galega das Industrias Culturais. A canle pública autonómica estreará en exclusiva a serie a través da súa plataforma de contidos dixitais infantís, antes de que viaxe por outros territorios e noutras linguas a través de diferentes operadores.
Comeza o camiño para chegar a todas as casas de Galicia
Durante a fin de semana do 29 de novembro, Bibopalula contará cun stand no Culturgal, que se celebrará un ano máis en Pontevedra. Alí darase a coñecer entre público e visitantes e terá lugar unha presentación aberta ás familias o domingo día 1 de decembro.
Coa intención de dar a coñecer Bibopalula, durante o mes de decembro desenvolveremos unha intensa campaña que incluirá a publicación dun conto, a aplicación móbil da serie, ou contidos complementarios a través de YouTube e as principais plataformas de música en streaming. A partir de xaneiro está prevista a publicación dunha unidade didáctica que recollerá contidos relacionados co coidado da natureza ou a música, que se completarán con visitas dos protagonistas a diferentes centros educativos.