O festival Castelo Conta foi o escenario elixido para a estrea de ‘Nena’, curtametraxe dirixida por Xosé A. Touriñán e Jairo Iglesias. A Eira do Ferrador, no lugar de Xalo, en Castelo (Culleredo) acolleu un pase moi especial ao que asistiron os protagonistas do filme. O lugar ten especial relevancia xa que é a parroquia na que naceu e vive Touriñán, quen escribiu esta historia sobre a perda e os afectos protagonizada por unha nena que ten que asumir un papel que non lle corresponde por idade.
Na estrea, Touriñán quixo agradecer a todo o equipo do filme por facer posible a rodaxe desta curta, así como a Deleite, o Concello de Mondoñedo e Agadic; polo seu apoio. Carlos Blanco, David Perdomo, Noemi Rodríguez, Patricia Castrillón e Antía Touriñán compartiron despois da proxección as súas primeiras impresións, marcadas pola emoción de ver ‘Nena’ proxectada entre tantos amigos e veciños.
Ao finalizar, Belém Tajes, autora da banda sonora, ofreceu un concerto que puxo o peche a unha noite moi especial.