Menos dun ano despois da súa estrea, ‘Nena’ non deixa de dar alegrías. A curta protagonizada por Antía Touriñán xunto a Carlos Blanco, David Perdomo e Xosé A. Touriñán vén de recibir tres premios nas últimas semanas. No Firm Film Festival de Valladolid, gañou o premio á Mellor Curtametraxe de Ficción e o Premio do público. Pola súa banda, o FICCI-ON de Ciudad Rodrigo, concedeu a ‘Nena’ a mención especial do xurado.
Estes últimos premios súmanse a unha lista que xa vai polas dúas cifras e que levou esta historia orixinal de Touri por todo o mundo. A curta fala dos coidados e das cargas que recaen, moitas veces, en aquelas que precisarían que as coidasen máis que coidar.
Polo momento, a curtametraxe seguirá polo circuíto de festivais onde está recibindo tan boa acollida. A canción orixinal foi composta por Belém Tajes, e podes escoitala aquí.