As primeiras imaxes desta peza producida por Undodez e Mordisco foron proxectadas á veciñanza que participou da súa creación. A curta protagonizada por Antía Touriñán, Carlos Blanco, David Perdomo e Touriñán foi rodada o pasado verán e estrearase na primeira parte deste ano
O pasado 28 de decembro, compartimos unhas primeiras imaxes da aínda inédita curtametraxe Nena foron coas veciñas e veciños de Mondoñedo. Alí desenvolveuse a rodaxe o pasado verán e tanto a veciñanza, coma o Concello e os comerciantes involucráronse neste proceso que tivo por escenarios a parroquia da Coubeira e o centro histórico mindoniense.
Nena fala de perda e tamén de afecto, dos coidados e do xénero; conta unha historia ideada por Xosé A. Touriñán dende hai tempo que rematou por escribir durante o confinamento. Nesta primeira parte do 2023 terá lugar a estrea oficial e arrinca tamén o seu percorrido polos festivais especializados.
Os protagonistas desta historia son Antía Touriñán (a “nena” que dá nome á curta), Carlos Blanco, David Perdomo e o propio Touriñán (o avó, o tío e o pai da nena, respectivamente). Entre os personaxes secundarios, Antía está acompañada do seu irmán Andrés, que ten un pequeno papel. O resto do elenco complétano Noemi Rodríguez, Rubén Prieto, Patricia Castrillón, Andrés Mahía, Octavio Villazala e Sergio Zearreta. Esta produción de Undodez e Mordisco conta co apoio da Agadic.