“Unha festa, pero no sentido de comunidade, de compartir”, así explicaban Claudia e Marina de Abril como entendían a música tradicional. E iso foi o que fixemos para presentar esta primeira temporada de Recollendo Músicas. Unha festa na que xuntar as e os artistas que participan no programa, o equipo técnico e o resto de persoas involucradas no proxecto.
En representación da Televisión de Galicia, acudiu Fernando Ojea, director de contidos da CRTVG, quen animou aos presentes a navegar nos contidos culturais e de entretemento de AGalega ao tempo que recalcou a importancia do traballo dos artistas que manteñen viva a nosa música.
Saúl Rivas e Borja Casal, directores do proxecto, coincidiron en agradecer e recoñecer aos participantes desta primeira temporada o seu labor e incidiron na importancia de compartir as nosas músicas e difundilas a través dos medios públicos. Os asistentes puideron desfrutar dun avance exclusivo de toda a temporada e unha sesión musical moi especial co Dúo Cro-Cró.
En Recollendo Músicas, achegámonos ás propostas de diferentes grupos e artistas que, a partir da música tradicional, desenvolveron proxectos musicais que van desde o folk ao pop, pasando pola electrónica, a psicodelia ou a música de baile. Trátase dun formato breve, pensado para o consumo multidispositivo e no que a música é a protagonista absoluta.
Nesta primeira temporada coñecemos as propostas de Belém Tajes, Comando Curuxás, Alana, Nebra, Breo, Lontreira, Moura, Abril, Carme López e Carabela. Os capítulos están dispoñibles en AGalega.gal e nas aplicacións para iOS, Android e televisións intelixentes. Tamén podes consultar toda a info, acceder aos contidos e escoitar as músicas que soan no programa en recollendomusicas.gal.
