A XXIII edición dos Premios Mestre Mateo da Academia Galega do Audiovisual ten xa gañadores, e o programa Recollendo Músicas, producido por Undodez, é un deles. Pouco despois das doce e medio da pasada noite os directores Álvaro Gago e Jaione Camborda anunciaban o galardón da categoría de mellor programa, na que o formato estreado pola Televisión de Galicia o pasado outono foi o máis votado polas académicas e académicos.
Os directores de Recollendo Músicas, Saúl Rivas e Borja Casal, recolleron o premio acompañados no escenario do Lalín Arena polo equipo de produción do programa, Laura Canto, Miguel Vázquez e Laura Sixto, e do equipo de Einibó, Adolfo Fernández e Lucas Lombardía, encargados da realización. Na súa intervención destacaron poder compartir categoría con outros programas –Cinephilia, Cos pés na terra e Nosoutras– “nos que a cultura, a etnografía e a tradición son a base”.
“Sen o idioma non seríamos galegos, pero sen as nosas músicas seríamos unha cousa moi distinta ao que somos”
Agradeceron tamén a todos os artistas e asociacións que manteñen “o enorme patrimonio que é a nosa música tradicional e a nosa literatura de tradición oral”. Saúl Rivas explicou que o papel dos directores no programa consistía en escoitar desde o respecto e as ganas de aprender.
Borja Casal compartiu o premio con todas as artistas e formacións que participaron en Recollendo Músicas, e puxo en valor “o legado das nosas informantes, maiormente mulleres, que ao longo de décadas compartiron as súas emocións en forma de cancións”.
Sobre Recollendo Músicas
Recollendo Músicas é unha exploración pola pegada que a música de raíz e os ritmos tradicionais galegos teñen nas músicas actuais, a través de propostas de artistas e grupos que manteñen viva a tradición a través de novas linguaxes e sonoridades modernas.
O programa pode verse en AGalega, a plataforma dixital de contidos audiovisuais da Televisión de Galicia.