Este luns rematan as votacións coas que a Academia Galega do Audiovisual escolle cada ano ás obras e profesionais máis destacados do audiovisual galego. Preto de cincocentas académicas e académicos deciden desde hai dúas semanas os mellores traballos do 2024, que se darán a coñecer nunha gala en Lalín o próximo 15 de marzo.
Undodez suma seis candidaturas repartidas entre catro traballos, todos eles emitidos pola Televisión de Galicia e accesibles a través da plataforma AGalega.
Bibopalula, debuxos en galego candidatos a mellor serie
A serie dirixida por Laura Mahía foi unha das grandes sorpresas ao resultar ser finalista na categoría de mellor serie. Había case vinte anos que unha produción de animación non aspiraba a este premio. Bibopalula compite con Rapa, de Portocabo, e El circo de los muchachos e Clanes, de Vaca Films. Nas últimas semanas a serie de Undodez publicou nas súas redes sociais un vídeo no que algúns membros da Banda do Bosque suxerían ás académicas e académicos a posibilidade de que unha serie de debuxos se fixera cun dos premios máis relevantes do certame.
Recollendo Músicas e Nosoutras, o 50% das opcións para mellor programa e realización
Catro das seis candidaturas finalistas de Undodez xúntanse nas producións Recollendo Músicas e Nosoutras. Estreado o pasado outono, Recollendo Músicas está dirixido por Saúl Rivas e Borja Casal, e foi unha das grandes propostas de AGalega, a plataforma de contidos dixitais da Televisión de Galicia, nesta temporada. Trátase unha exploración pola pegada que a música de raíz e os ritmos tradicionais galegos teñen nas músicas actuais, con diferentes propostas de artistas e grupos que manteñen viva a nosa tradición a través de novas linguaxes e sonoridades modernas. Nosoutras, dirixido por Amara Fontao e presentado por Isabel Garrido, estrouse hai xa un ano, tamén en AGalega. É un espazo no que achegarse desde o humor, a curiosidade e a admiración a aquelas referentes da nosa cultura que non aparecen moitas veces no imaxinario colectivo polo feito de ser mulleres. Os dous programas compiten na categoría de mellor programa entre eles, e con Os pés na terra e Cinephilia, que xa gañaron o galardón noutras ocasións.
En canto a categoría de mellor realización, os realizadores de Recollendo Músicas e Nosoutras, Adolfo Fernández e Jairo Iglesias, son tamén finalistas. Neste caso aspiran a un premio que tamén poderían gañar Marcos Nine (Historias de aquí) e Simone Saibene (Cinephilia).
Lucía Veiga, dobre finalista nos Mestre Mateo
A sexta candidatura finalistas de Undodez é pola serie Na Gloria, e na categoría de mellor interpretación feminina protagonista. A actriz Lucía Veiga -que tamén aspira ao premio a mellor actriz de reparto polo seu traballo en As Neves-, compite con Andrea Varela (As Neves), Carmen Machi (Tratamos demasiado bien a las mujeres), e Mónica López (Rapa).
A gran festa do audiovisual galego
Os Premios Mestre Mateo entregarán un total de vinte e cinco galardóns nunha gala que presentará Teté Delgado, que contará coa música de Baiuca, e na que a script Encarna Alonso recibirá o premio de honra. Será a vixésimo terceira edición do certame que organiza a Academia Galega do Audiovisual.