Alana vén de estrear Vilardevós, unha muiñeira reinterpretada ao seu estilo que parte dunha recollida feita ás veciñas de Terroso, en Vilardevós. A rodaxe, realizada na Coruña o pasado 8 de febreiro, reuniu un amplo equipo artístico e técnico para construír un videoclip que transmite festa, balbordo e alegría compartida, reforzada pola presenza de PAN.SEN.FRON.
A canción parte desta recollida, unha memoria oral que transmitía un claro ambiente de celebración. Esa sensación foi o punto de partida conceptual do videoclip: unha festa entre amigas, un espazo de encontro onde a música e a comunidade funcionan como motor emocional. Neste contexto, a participación de PAN.SEN.FRON resultou natural, xa que o colectivo coruñés leva anos traballando precisamente na recuperación e difusión da música tradicional galega a través da voz e da percusión, especialmente das pandeiretas.
Musicalmente, Vilardevós é unha muiñeira reinterpretada desde a linguaxe sonora propia de Alana, que combina raíces tradicionais con bases electrónicas e pulsións pop. Esta mestura forma parte do ADN do proxecto, integrado por Antía Vázquez, Pablo Castro e Eloy Vidal, que desde a súa creación traballa sobre recollidas do repertorio popular para transformalas nunha experiencia musical contemporánea sen perder a súa identidade.
O videoclip reforza esa mesma idea desde a imaxe: tradición e presente conviven nunha posta en escena que aposta pola cor, o movemento e a sensación de colectividade. A dirección de arte e o estilismo constrúen un universo visual dinámico e vitalista, mentres o baile e a presenza da figuración contribúen a transmitir esa atmosfera de celebración compartida que inspirou o proxecto.
A peza contou cun equipo técnico formado por Einibó na realización, Xoán Fórneas como auxiliar de dirección, Sara Temes e Adolfo Fernández na dirección de fotografía, Noel Iglesias na dirección de arte e Laura Canto na dirección de produción, ademais do equipo habitual nas producións de Undodez e outros profesionais. O proxecto recibiu tamén o apoio da Xunta de Galicia a través da Axencia Galega de Industrias Culturais (AGADIC).
Con Vilardevós, Alana continúa a expandir a súa proposta artística, consolidándose como unha das voces que está a redefinir a relación entre música tradicional e creación contemporánea en Galicia. O videoclip convértese así nunha nova peza dentro dun percorrido que segue a explorar como as melodías herdadas poden dialogar co presente e abrirse a novos públicos.