Varios séculos antes da visita á Coruña dos foraxidos máis coñecidos ao noroeste do Oeste, Javier Veiga e Xosé A. Touriñán xa estiveran aos pés da Torre de Hércules, na praia de Riazor, e mesmo planificaran a visita á cidade dalgúns dos grandes emperadores.
Coruña Vadis circula xa por grupos de WhatsApp e publicacións compartidas en redes sociais de centos de coruñesas e coruñeses. É a nova proposta do Concello para contar polo mundo todas as virtudes da cidade na que se ubica o faro máis antigo do mundo en funcionamento, en cuxa construción participou o escravo Cayo -Xosé A. Touriñán-.
Publicado este venres á noite nas redes sociais municipais, suma xa decenas de miles de reproducións. Producido por Medio Limón, a produtora de Javier Veiga -tamén director do anuncio-, en colaboración con Undodez, contou cun equipo de máis de trinta profesionais, maioritariamente galegos.
Carlos Pérez Gascó é o director de fotografía da curtametraxe, Alfred Tapscott o autor da música orixinal, Isabel Vila a autora dos grafismos, Andrea Pozo a encargada da dirección de arte, e Laura Canto a directora de produción. A peza contou tamén coa actriz Lucía Veiga para a voz en off, e foi rodada nas primeiras semanas de xaneiro na cidade.