A instalación ‘Deslocalizando Xeosónica’ poderá verse en diferentes vilas da provincia da Coruña durante as próximas semanas
Deslocalizando Xeosónica: un percorrido sonoro do mar ás vilas é unha instalación itinerante que busca levar a creación sonora e a reflexión sobre o ruído que nos rodea a lugares que adoitan ser alleos a estas experiencias artísticas. Pretende tamén motivar unha reflexión na cidadanía sobre a presenza constante de ruído nas nosas vidas e contornas, presentada en forma de creación dixital de vangarda.
Esta acción é unha peza máis do proxecto transmedia Xeosónica, un traballo que fai unha exploración do son desde un punto de vista artístico e didáctico. Configurado como un puzzle multimedia con múltiples pezas, ofrece paisaxes sonoras, entrevistas con expertos, gráficas informativas, intervencións artísticas e creacións sonoras. Un enfoque experimental no que o ruído se proxecta como desestabilizador da vida, cuestionando o proceder actual e iniciando unha viaxe dende a natureza á humanidade.
Deslocalizando Xeosónica leva as experiencias artísticas fóra do seu contexto mediante unha instalación itinerante de son binaural e proxeccións dentro dun contedor marítimo. Esta instalación percorrerá as vilas da provincia da Coruña, resignificando prazas, rúas e incluso pequenos portos alonxados do gran estrondo presente en factorías e canais de paso de transportes pesados.
Agora, esta instalación comeza un percorrido dende o mar ás vilas, para converter as prazas do interior da provincia da Coruña en pequenos centros de arte ao aire libre. O contedor marítimo de Deslocalizando Xeosónica inicia este xoves, 23 de decembro, o percorrido en Carral, onde estará instalado no Campo da Feira. Despois, continuará o seu percorrido pola provincia:
- Carral · Campo da Feira · 23 e 24 de novembro
- Ordes · Alameda de Ordes · 25 e 26 de novembro
- Zas · Praza Jorge Mira · 27 e 28 de novembro
- Negreira · Praza do Concello · 29 e 30 de novembro
- Carballo · Praza do Concello · 1 e 2 de decembro
- Cerceda · Campo da Feira · 4 e 5 de decembro
A entrada á experiencia inmersiva de Xeosónica é de libre acceso, os horarios de apertura son de 11.00 a 14.00 e de 15.00 a 18.00 horas.
Este actividade conta para a súa realización co apoio da Deputación da Coruña a través do seu programa de axudas a proxectos singulares de especial interese cultural.