AGalega, a plataforma de contidos dixitais da Televisión de Galicia estrea este xoves, día 10 de outubro, Recollendo Músicas, un novo formato que explora a pegada dos sons e os ritmos tradicionais nas músicas actuais. Cunha concepción e estilo visual pensados para a súa distribución en plataformas, Recollendo Músicas busca o influxo que as nosas músicas tradicionais teñen nos ritmos, sons e na produción de artistas e bandas actuais.
A música galega está vivindo un momento de gran popularidade e, moitos dos artistas e formacións, actualizan ou incorporan nas súas propostas ritmos, sons, samples… de melodías e cancións populares. Recollendo Músicas indaga neste fenómeno da man dos seus protagonistas.
Ao longo de dez episodios, o formato achega a visión persoal dos artistas arredor das nosas músicas de raíz, compoñendo unha visión de conxunto que nos axuda a comprender mellor o gran momento que vive a música galega tanto a nivel creativo como de públicos.
Achergarnos ás nosas músicas desde a actualidade
Recollendo Músicas é unha exploración pola pegada que a música de raíz e os ritmos tradicionais galegos teñen nas músicas actuais. Coñecemos diferentes propostas de artistas e grupos que manteñen viva a nosa tradición a través de novas linguaxes e sonoridades modernas.
Os primeiros protagonistas serán a cantora Belém Tajes e os Comando Curuxás. A estrea será este xoves 10 de outubro, saíndo dous episodios novos cada semana. Alana, Nebra, Breo, Lontreira, Moura, Abril, Carme López e Carabela son os protagonistas desta primeira temporada. Todos os capítulos estarán en aberto na plataforma AGalega, dispoñible para Smart TVs, Android, iOS e na web.