O documental Ao son da nova regueifa continúa o seu percorrido público cunha nova parada en Vedra, onde será proxectado dentro da programación do Festival MARCO. A sesión terá lugar o venres 8 de maio ás 12.30 no Centro Sociocultural, integrándose nun programa que combina reflexión, práctica e creación arredor do rural.
Impulsado pola Asociación Cultural MARCO, o festival celebra a súa segunda edición entre os días 8 e 10 de maio cun formato que afonda na relación entre arquitectura, cultura e comunidade. Lonxe de configurarse como un encontro estritamente académico, a proposta articúlase como un espazo aberto no que profesionais, artistas e veciñanza comparten experiencias, coñecementos e procesos creativos. Nesta edición, o foco sitúase na cultura etno-pop e na arquitectura da auga, con especial atención aos muíños como espazos de memoria e de activación contemporánea.
Neste contexto, a presenza de Ao son da nova regueifa dialoga de maneira directa co espírito do festival. Dirixido por Manolo Maseda e Saúl Rivas, o filme propón unha viaxe polo presente da regueifa, explorando as conexións entre a tradición oral e as súas formas actuais de expresión. A través dun percorrido que atravesa Galicia, o documental constrúe un relato coral no que participan regueifeiras e regueifeiros de distintas xeracións, poñendo en valor a diversidade e a vitalidade desta práctica.
A peza aborda a regueifa como unha arte en transformación, situada entre a herdanza e a innovación, entre o rural e o urbano, entre a transmisión oral e os novos espazos pedagóxicos. Verso improvisado, música e testemuñas persoais rematan entrelazándose para dar forma a un retrato poliédrico dunha tradición que continúa a reinventarse no presente.
A proxección forma parte do bloque ADREDE (Arte e Deseño en Rede), un dos eixos do festival, no que se integran propostas artísticas, exposicións e accións que reinterpretan o territorio desde linguaxes contemporáneas. A presenza dos directores na sesión permitirá, abrir un espazo de encontro co público arredor do proceso creativo e das cuestións que atravesan o documental.
Con esta nova proxección, Ao son da nova regueifa segue consolidando o seu percorrido en festivais e ciclos, reforzando o seu papel como ferramenta para a difusión e actualización dunha das expresións máis singulares da cultura oral galega.