Nena xa ten viaxado moito mais aínda non visitara América do Norte. A curta terá as súas primeiras proxeccións nos Estados Unidos e o Canadá este verán. Nesta semana, participará no programa de curtametraxes internacionais do Frozen Film Festival de San Francisco. Este programa, composto por trece producións, será o encargado de inaugurar a 18ª edición deste certame que se celebra no corazón da cidade californiana.
No mes de agosto, Nena viaxará á outra punta do continente, á pequena localidade de Percé, no leste do Quebec, no Canadá. O festival Les Percéides celebrará a súa 5ª edición do 19 ao 25 de agosto, cun amplo programa de cinema e artes, composto por curtametraxes e longametraxes internacionais e tamén con ampla participación da vila.
A curta leva dadas moitas alegrías desde a súa estrea no verán de 2023. Nena comezou axiña a obter seleccións e premios en festivais en toda Europa. Agora, agardamos seguir esta boa xeira na que acumula 12 premios e máis de 30 seleccións en festivais e mostras de cinema.