Pantalla

Un espazo para acceder a todos os contidos producidos por Undodez que son accesibles de balde a través de distintas plataformas.

Pipo

O primeiro día do novo curso escolar, Berta descubre no patio traseiro a Pipo, un extraterrestre que caeu do ceo. Berta decide acollelo no seu cuarto sen saber que Pipo é bastante diferente a ela: ruidoso, desordenado… E cun apetito desbocado que fai que coma practicamente calquera cousa. Pero ademais de moita fame, Pipo ten tamén outros moitos secretos.

Vilardervós · Alana

Alana, o proxecto musical que fusiona a música tradicional galega con ritmos electrónicos e pop, presenta o seu videoclip Vilardevós.

A peza, parte dunha recollida realizada ás veciñas de Terroso, en Vilardevós, que transmitía un ambiente de festa, balbordo e alegría compartida. Inspirado nesta memoria oral, o videoclip constrúe unha celebración colectiva onde a música funciona como motor de encontro e comunidade. A peza, dirixida por Einibó e producida por Undodez, combina tradición e electrónica e conta coa participación do colectivo PAN.SEN.FRON, así como dos membros de Alana: Antía Vázquez, Eloy Vidal e Pablo Castro. A rodaxe tivo lugar na Coruña, reunindo un equipo artístico e técnico que deu forma a unha posta en escena dinámica, colorida e vitalista, reforzando a sensación de festa compartida que inspira o tema.

Añobres · Alana

Alana, o proxecto musical que fusiona a música tradicional galega con ritmos electrónicos e pop, presenta o seu videoclip Añobres, dirixido por Saúl Rivas e Adolfo Fernández.

Añobres é unha homenaxe a Delfina de Añobres, unha muller cuxas coplas foron recollidas por Dorothé Schubarth en 1979 para o Cancioneiro Galego de Tradición Oral. O videoclip, protagonizado por Xoán Fórneas, foi rodado na casa natal de Delfina, en Añobres (Muxía), e conta coa participación dos seus familiares e dos membros de Alana: Antía Vázquez, Eloy Vidal e Pablo Castro.

Bibopalula

‘Bibopalula’ é unha serie musical deseñada para ver múltiples veces por espectadores primeirizos, de ata catro anos. Colorida, divertida e ambientada nun bosque amable, ‘Bibopalula’ componse de historias de cinco minutos protagonizadas por paxaros que teñen un grupo musical e nas que a natureza -e os seus ciclos- ocupa sempre un lugar principal.

Protagonizada pola pega Pegui, o merlo Merli, o paporrubio Robin e o peto Carpin, a serie busca achegar a vida natural próxima a nós ás nenas e nenos que se achegan por vez primeira ao audiovisual.

Recollendo Músicas

Recollendo Músicas é unha exploración pola pegada que a música de raíz e os ritmos tradicionais galegos teñen nas músicas actuais. Coñecemos diferentes propostas de artistas e grupos que manteñen viva a nosa tradición a través de novas linguaxes e sonoridades modernas.

Na Gloria

Pati, unha executiva en crise vital, deixa a súa vida anterior para instalarse en A Gloria, unha pequena localidade do Camiño Francés, coa idea de converter a casa dos seus avós nun albergue para peregrinos en busca de paz interior. Coa axuda do seu amigo Bertín, un esixente chef vegano, intenta recuperar o espírito feliz dos veráns da súa infancia.

Porén, axiña descobre que a vida rural non é tan idílica: os peregrinos non son tan espirituais, a convivencia cos veciños resulta caótica e unha serie de personaxes peculiares, especialmente o temperamental Lolo, acabarán poñendo a proba a súa paciencia, os seus plans e mesmo os seus sentimentos.

Nosoutras

Que pintora surrealista galega era admirada por Warhol? Quen tivo a idea de facer as xoias de porcelana de Sargadelos? Quen lle daba indicacións a un Castelao con graves problemas de visión para debuxar?

Presentado e interpretado por Isabel Garrido, Nosoutras é un espazo no que achegarse desde o humor, a curiosidade e a admiración a aquelas referentes da nosa cultura que non aparecen moitas veces no imaxinario colectivo polo feito de ser mulleres.

Bechos

Bechos é unha serie de animación infantil producida por Undodez para a Televisión de Galicia, dirixida por Andrés e Laura Mahía. A través das aventuras de catro pequenos animais, transmite valores como a amizade, o respecto pola natureza e a importancia de compartir e reciclar.

Estreada en 2023, a serie lanzou unha segunda temporada en 2025 con dez novos episodios e os mesmos protagonistas: Xurxo, Xiana, Catuxa e Margarida, consolidándose como unha aposta polos contidos infantís en galego.

A Quincena do Apóstol · Boyanka Kostova

O grupo compostelán Boyanka Kostova presenta o videoclip de A Quincena do Apóstol, un dos temas do seu álbum Ranaeira, baixo a dirección de Toño Chouza. A peza aposta por unha estética festiva que transforma a tradición nunha rave contemporánea, reforzando a súa mestura característica de electrónica, trap e folclore galego.

Xeosónica

Xeosónica é un proxecto transmedia que fai unha exploración do son desde un punto de vista artístico. Configurado como un puzzle multimedia con múltiples pezas: paisaxes sonoras, pílulas informativas, intervencións artísticas, creacións sonoras e unha curtametraxe na que o son é o protagonista absoluto. Un enfoque experimental e lúdico que nos leva a unha viaxe dende a natureza á humanidade.

Origen

Origen é un programa de divulgación gastronómica producido con Interpool Media para RTVE que viaxa á orixe do produto. Ao longo de oito episodios monográficos coñecemos en profundidade como se cultivan, crían, producen e consumen xoias da gastronomía española: o xamón ibérico, a gamba branca, o lechazo, a trufa, a alcachofa, a centola, a angula e o corzo.

Produtores, cociñeiros e outros profesionais convértense en divulgadores e embaixadores do produto que representan e da súa propia terra. As súas voces autorizadas son as narradoras dos procesos polos que pasa un produto desde a súa orixe ata o seu consumo. Quen mellor coñece a materia prima é quen mellor a pode explicar.

Catro Gatos

Catro Gatos é un formato de humor protagonizado por Xosé A. Touriñán, David Perdomo, Fátima Pego e Noemi Rodríguez. Os catro amigos reúnense nun bar no que falan da vida, das súas vivencias persoais e inquedanzas. Cada un deles recorda unha anécdota que dá paso aos sketchs, nos que os actores interpretan diferentes personaxes.

Somos Criminais

Carlos Blanco e Xosé A. Touriñán levaron o seu espectáculo máis exitoso a un formato audiovisual orixinal e inédito en Galicia, para ser emitido a través da rede, coa compra previa dun acceso, nunha única data e hora, coma se dunha función teatral se tratara.

Máis de 10.000 espectadores seguiron este experimento, cun particular esquema de realización no que os actores, sen espectadores no patio de butacas, escolleron dirixirse ao público a través das cámaras.

O músico Fredi Leis tocando o piano, plano do videoclip Nivel Experta

Nivel Experta · Fredi Leis

O intérprete galego presenta o seu novo single en acústico nun videoclip gravado en Santiago de Compostela, no que destaca o emprego da luz, nunha atmósfera que acompaña á melodía do piano, situado no centro dun amplo espazo.

Nena

Nena é unha curtametraxe que nos achega unha realidade social e cultural coa que conviven moitas familias. Unha peza audiovisual que afonda na perpetuación dos roles de xénero na esfera privada, se cadra, máis notorios que na pública; sobre as consecuencias de eludir responsabilidades e sobre o valor do compromiso.

Esta curtametraxe supón o debut na dirección de Xosé A. Touriñán, quen tamén protagoniza esta peza xunto coa súa filla Antía, Carlos Blanco e David Perdomo. Unha historia que fala da perda e dos afectos desde o punto de vista dunha nena de 12 anos. Un relato que, se apoia na comedia para falarnos de traxedia. Unha contraposición de termos que emprega o humor como valor engadido, como un recurso máis no medio dunha aprendizaxe cotiá e sen límites, implícita no mero feito de vivir. Nena é un convite á reflexión crítica, mais tamén á posibilidade de facelo dun xeito humano e desdramatizado.