Bechos é a serie de animación para primeiros espectadores producida por Undodez para a Televisión de Galicia. Dirixida por Andrés e Laura Mahía sobre os deseños desta última, a serie achéganos, a través das aventuras de catro animaliños, valores como o respecto pola natureza, a necesidade de compartir e reciclar e a importancia da amizade.
Tras unha primeira temporada de estrea en 2023, Bechos lanzou en maio do 2025 a súa segunda temporada, sumando dez novos episodios que amplían o universo da serie con novos escenarios e situacións, mantendo os mesmos protagonistas: Xurxo, Xiana, Catuxa e Margarida. A proposta consolídase así como unha aposta continuada polos contidos infantís en galego, producidos en Galicia e pensados para as primeiras idades.
Coas voces de Xosé A. Touriñán, Marita Martínez ou Patricia Castrillón, entre outras actrices e actores, Bechos reafirma o compromiso da televisión pública cunha animación de calidade, próxima e educativa.
As dúas temporadas poden seguirse na canle de YouTube da Televisión de Galicia, na app do Xabarín e na web da CRTVG.
