Estivemos en Castelo, Culleredo, presentando esta nova serie de animación para a Televisión de Galicia. Xosé A. Touriñán, produtor do proxecto e dobrador de Xurxo, un dos protagonistas de Bechos, estivo acompañado de Alba Mancebo, do departamento de contidos dixitais da Televisión de Galicia, e de Laura Mahía, deseñadora e animadora da serie para contarlle á cativada os detalles deste proxecto.
Os nenos e nenas presentes tiveron a oportunidade de ver en primicia o primeiro capítulo de Bechos, que desde hoxe mesmo está dispoñible na canle de Youtube da Televisión de Galicia, na app do Xabarín e na web da CRTVG. Esta serie é unha aposta de Undodez e a TVG por ofrecer contidos en galego, producidos con equipos do país e centrados nos primeiros espectadores.
Bechos está pensada para cativos e cativas de 3 a 6 anos e conta as aventuras de catro amigos: Xurxo, Catuxa, Xiana e Margarida. Catro animaliños cos que aprender o valor da amizade, o respecto polo medio natural, a xestión das emocións ou a importancia de compartir e reciclar. Xosé A. Touriñán, Laura Mahía, Laura Canto e Patricia Castrillón poñen voz a este grupo formado por un Xabarín preguiceiro e lambón, unha raposa espelida e argalleira, unha toupa refinada e orgullosa e unha vaca aventureira e prudente.
A serie está dirixida por Andrés Mahía, conta coa música de Santi Jul e Iván Laxe e os guións de Andrés Mahía, Saúl Rivas e Patricia Castrillón.