A cidade francesa de Lille acolleu a finais de marzo un dos grandes mercados europeos de contidos audiovisuais de ficción, o Series Mania Forum. Tres produtoras galegas, entre elas Undodez, estiveron presentes no evento como parte da delegación do Clúster Audiovisual Galego.
O equipo de Undodez puido presentar a distintas produtoras e canles dous proxectos de ficción, un deles de imaxe real, Mar de Fóra, e outro de animación para adultos, Lola, Porco & Paco. No primeiro dos casos trátase dunha comedia ambientada na Costa da Morte que introduce unha nova perspectiva nas series sobre narcotráfico no noso país, creada por Xosé Castro, Andrés Mahía e Xosé A. Touriñán. En canto á serie de animación, trátase dun dos proxectos que obtivo a maior puntuación nas axudas a desenvolvemento de proxectos da Xunta de Galicia do pasado ano; unha comedia para adultos que pretende observar a sociedade actual cunha mirada transgresora, orixinal e crítica.