Bibopalula chega á recta final da súa primeira temporada. Xabarín.gal estrea este venres as quince últimas entregas da serie, completando os cincuenta e cinco capítulos das aventuras da Banda do Bosque.
Os novos capítulos permitirán ás máis pequenas e pequenos coñecer novos pesonaxes e desfrutar de máis cancións. Robin, Carpin, Merli e Pegui enfrontaranse desta vez a enigmas como unha cova que fala, a volta do Titanic ao bosque, ou a busca da canción favorita do Señor Moucho. Tamén vivirán momentos emotivos, como a despedida das andoriñas rumbo a África. No último episodio todos os paxaros tentarán compoñer unha canción xuntos.
Bibopalula converteuse desde o pasado 29 de novembro no contido máis visto da plataforma de contidos de entretemento infantil da Televisión de Galicia, Xabarín.gal. A serie, producida por Undodez e creada por Andrés Mahía e Laura Mahía, chegou xa a milleiros de cativas e cativos grazas a unha completa campaña de promoción con accións de publicidade exterior, prensa, radio ou a participación dos seus protagonistas en eventos como o Culturgal, partidos do Deportivo e o Celta, ou a cabalgata dos Reis Magos da Coruña, así como diferentes centros educativos.
En paralelo á emisión da serie en Xabarin.gal, Bibopalula estreou o seu primeiro libro infantil, unha colección de roupa, e publicou todas as cancións da Banda do Bosque en YouTube e nas principais plataformas de audio. Nas pasadas semanas, parte do equipo de Bibopalula asistiu en San Diego (California) a un dos principais mercados de contidos de animación, onde distintas distribuidoras e canles de todo o mundo amosaron o seu interese pola serie.